هل للعودة أمل

[المغترب]

الى كل من يعيش في العراق الحبيب هل تضنون ان هناك أمل للعودة الى أحضان الوطن لقد هاجرنا بسبب خارج عن أرادتنا نعرف جيدا ان العراق يجب أن يتشارك فيه جميع أبناه لاعماره لاكن صدقو ا ان الغربة هي أمر شيء حينما يأتي الغروب وتنضر الى صور أهل وأصدقائك وتذرف الدموع ولكن سوف يأتي اليوم الذي نعود فيه ونبني العراق وننافس احسن الدول فالعراق بلد الخيرات وكما يقولون انت راقي وشعبك راقي لوضاع أسمك كول عراقي وحبيت أكول ( يالون الشرف ياكل وقار الشيب
يا اول عدل كل يوم يتوذر
ما تنكص ركبتك منه حتى السيف
على ركبتك السيف السيف يتحذر
عينك بالغضب يتغطة منه الموت
وتعمه من البجي لو طفل يتعور
عمال المساطر فجروهم بيك
خافوا بيهم المهدوم يتعمر
خافوا من صورهم تنعكس بالماي
ورادوا وجه مايك لونه يتغير
وحاروا بالكبب من عدها راسك وين
شكو بالجبيرة راس يتفجر
موكبة الهادي راسك المطلوب
لان ليشوفهم جن توم يتصور
تبا للحرب حتى بسمانة جروح
كفاكم هذا خاين وذاك يتكفر )

[الكونتيسة]

انشالله اخي المغترب
تعود بالسلامة لاحضان
وطنك وترجع
بين اهلك وناسك
غمة وتزول بعون الله
تحياتي الك

[SINAN-IQ]

ان شاء الله يعود كل غائب بأذن الله واهل البيت
الله يكون بالعون .. الغربه صعبه كلش وفراق الاحبه اصعب ..
ترجعون وانتو راسكم عالي بأذن الله ويعود كل غائب لاهله
هذا حال كل الشعوب ، من يكون هناك اضطراب يلجئون على دول اخرى
يعني مو بس العراقي بهذا الحال

اللهم اكشف هذه الغمة عن هذه الامة بحق محمد وآل محمد

شكراً سيوفي على الموضوع وبارك الله بك

سنان

[عبد الرماحي]

ماعندي جرح يتحمل اللجمات
ولا ظل حيل عندي وللملامة احمل
صرت جتال خلك ليش يالمحبوب
وليش بلا ذنب لليوفي الك تجتل
مو عشرة شمع راح اشعل العشرين
بس كونك تجينه وبأرضنه اتحل
آخر مرة شفتك جنت مامرتاح
كلامك بيه عبرة وتضحك اتمثل
شبيك آنه اسألت كتلي طبيعي الحال
وحالك موطبيعي وجنت متبدل
اعرفك مثل روحي واكثر من الروح
كلي شبيك واحجي ومني لاتخجل
لجن واكف عفتني ورحت عني بعيد
اذا زعلان كلي بيا سبب تزعل
مثل واحد لأمه جنت احن اعليك
وجنت بنياط كلبي هواي تتمعجل
ابعدت عني وبقيت متاني ترجع يوم
ومثل مهرة احلامي اتنطرك تصهل
عسه بعيني العمة لو انته مو بالعين
وكون من البواجي ادموعها اتوشل
بفراكك حبيبي مالفاني العيد
وصدك يوم عيدي يوم بيه اتهل
نهاري صار ظلمة وبردي اصبح كيض
والعسل علكم صبح والعز تبدل ذل
ونسيت اسم الفرح ومن الضحك محروم
واتسله بهمومي وبالحزن اشتل
واليشتل حزن مايحصد الا الضيم
والضيم اللفاني ماجره اعلى الكل
ليالي سود مرن ماتبعهن نور
لانجمة التلالي ولا ضوة الينزل
مثل هلة العيد اتنطرك ظليت
وبيك افرح طفل يوم اللي بيه اتطل
وجن فرحة يتيم بلعبة يوم العيد
كلبي بيك يفرح لو علي تجبل
وافرش روحي سجادة اعلى دربك دوم
واظل طول العمر بعيونك اتغزل
ولك ارجع اليه وخلي افرح يوم
كافي من الزغر بهمومي متمشكل
تحياااااااااااااااااتي لك
وشده وتزول وانشاء الله ترجع النه
اخوك ابو زهراء

[المغترب]

أعزائي (همسات _ سنان _ ابوزهراء ) اشكر مشاعركم الرائعة وانشاء الله شدة وتزول
سيف

[عبد الرماحي]

وطن ومنفى

أحبك ياوطن بيّه طفح كل كيل
ومااكَدر بعد حبّك بعد شخفي

وأذا عندك عتب تعتب لأن مرخوص
يمكن بس عتابك ناري يطفّي

وأذا قصدك هجرتك والله انه مجبور
لو تدري شفت چان عذرت ظرفي

شفت بعض البشر باعوك يابو الخير
من صاحوا مزاد انريدك نصفّي

وشفت تدري شفت مايخطر اعله البال
يذبحني الاخوا لو مد اله چفّي

وشفت دجله بچه حن وذكر بغداد
ورحل صاح وحده الأيد ما تكفي ... !!!

أعوفك والسبب عندك صبح معروف
وتطلبني تظل دينك فلا وفيّ

أحبك ياوطن من الألف للياء
يلحبك مرض ماله دوه يشفي

اتغرّب نعم ما أختلف ويّاك
بس كَلبي وعلي ايحسك بصفّي

ولجل بس خاطرك شاعر سهر ياحيف
كل ليله يدوّر عن وصف يكفي

لكيتك يا فجر تذبح سواد الليل
وكل هذه قليل بحقكم وصفي

واذا بالغ تظن يالسامع بهالصوت
خارطة الوطن راسم على چتفي

وطن لتظن نسيتك لا ولا أنساك
أنسه حسين لو أنسه تظن طفّي
أنسه حسين لو أنسه تظن طفّي

[المغترب]

اتغرّب نعم ما أختلف ويّاك
بس كَلبي وعلي ايحسك بصفّي

روعة أنت عمو أبوز هراء وما قدمت من شعر رائع وجميل تقبل خالص تحياتي
سيف

[mawj]

الاخ العزيز سيف
ان شاء الله ربي يرجع كل شخص بعيد عن وطنه
بحق محمد والِ محمد

ويبقى الامل

[المغترب]

موجة أشكر أحساسج الجميل والرائع

[عبد الرماحي]

اخوي سيف نصيحه من عندي والله لاترجع
يمعود ثق بالله العلي العظيم احنه اهل البلد اصبحنه غرباء واللي اجوي
هم اسياد العراق وكان لم تكن لنا يد في بناء هذا الوطن ودمت
اخوك ابو زهراء

[المغترب]

ابوزهراء كلامك على عيني وراسي بس الغربة ترة مرة

[بنت الفرات]

اخي العزيز سيف
فعلا انت سيف بكلماتك الرنانة دمت متالق
ويار ب ترجع بالسلامة

لكن سيوفي انا رايي من راي بابا ابو زهراء
المن ترجع
لان نحن اصبحنا غرباء عن الوطن
تعرف لويش
من ترجع تنصدم بالواقع وتعرف كيف صار العراق دمية بيد ضعاف النفوس

تسلم عمري

[المغترب]

عزيزتي الغالية

بنت الفرات اشك كلامج الرائع بس والله بس كعدة الصبح وشوفة جيرانك تسوى ملك الدنيا
بسو وكفت صديقك يمك بالضروف الصعبة تسوى ملك الدنيا

تقبلي خالص تحياتي